የፕሪሚየር ሊጉ የዋንጫ ሽሚያ ዳግም አገረሸ?

የዩናይትድ መነቃቃት ቢቀጥልም፣ መሬት የረገጠ እውነታ ግን አሁንም አለ

ድሉ ዩናይትድን ወደ አራተኛ ደረጃ ከፍ ያደረጋቸው ሲሆን፤ በሚኬል አርቴታው አርሰናል በ12 ነጥብ፣ በሁለተኛና በሶስተኛ ደረጃ ላይ ከሚገኙት ማንችስተር ሲቲ እና አስቶን ቪላ ደግሞ በ8 ነጥብ ዝቅ ብለው ይገኛሉ። እንዲሁም ከቼልሲ እና ሊቨርፑል በጠባብ ልዩነት ቀድመው ተቀምጠዋል። ምንም እንኳን አሁን ላይ በክለቡ ውስጥ ተስፋ ቢኖርም፣ የማይክል ካሪክ ቡድን ለዋንጫው ዘላቂ ፉክክር ያደርጋል ብሎ በእውነት የሚጠብቅ ግን ጥቂት ነው።

ካሪክ ራሱ ቡድኑ የአራተኛ ደረጃን ይዞ ለማጠናቀቅና ለሻምፒዮንስ ሊግ ለማለፍ በሚያደርገው ተጨባጭ ጥረት ውስጥ “ከፊቱ ትልልቅ ጨዋታዎች” እንዳሉ በመጥቀስ፣ የሚጠበቀውን ግምት ለማቀዝቀዝ ፈጣን ነበር። ሆኖም በሲቲ እና በአርሰናል ላይ ተከታታይ ድሎችን ካስመዘገቡ በኋላ በኦልድ ትራፎርድ ዙሪያ ያለው መንፈስ በከፍተኛ ሁኔታ ተቀይሯል።

የዩናይትድ ማንሰራራት ይበልጥ አስገራሚ የሚያደርገው፣ ክለቡ ባለፉት ወራት ውስጥ የነበረበትን ቀውስ—ሩበን አሞሪም በኃላፊነት ላይ ከቆዩ ከ14 ወራት በኋላ መባረራቸውን ጨምሮ—ስትመለከት ነው። በሊጉ የደረጃ ሰንጠረዥ አናት ላይ የሚገኙት ክለቦች ወጥ የሆነ አቋም ማሳየት አለመቻላቸው፣ የውድድር ዓመቱ መዝጊያ ምን ሊሆን እንደሚችል ለመገመት አስቸጋሪ እንዲሆን በር ከፍቷል።

አርሰናል በከፍተኛ ጫና ውስጥ መንገዳገድ ጀምሯል

አርሰናል የአራት ነጥብ መሪነቱን ቢይዝም፣ ከዚህ ቀደም የነበረው መረጋጋት ግን አሁን ላይ አይታይባቸውም። ካለፉት ሶስት የሊግ ጨዋታዎች ማግኘት የቻሉት ሁለት ነጥብ እና ሁለት ግብ ብቻ መሆኑ፣ ለዋንጫው ያላቸውን ብቃት ጥያቄ ውስጥ ከትቶታል።

ፔፕ ጋርዲዮላ ባለፈው አርብ አርሰናልን “በዓለም ላይ ምርጡ ቡድን” ሲል ገልጿቸዋል—ይህ ምናልባት የሥነ-ልቦና ጨዋታ (mind games) ሊሆን ይችላል—በሻምፒዮንስ ሊጉ ያላቸው እንከን የለሽ ጉዞም ይህንኑ የፔፕ ንግግር የሚደግፍ ይመስላል። ሆኖም ከዩናይትድ ጋር በነበረው ጨዋታ በኤምሬትስ ስታዲየም ውስጥ ጭንቀቱ በግልጽ የሚታይ  የነበረ ሲሆን፣ የግብ ማስቆጠር ብቃት ማነስም አሳሳቢ ጉዳይ እየሆነ መጥቷል።

በፕሪሚየር ሊጉ የአርሰናል ከፍተኛ ግብ አግቢዎች ሌአንድሮ ትሮሳርድ እና ቪክቶር ዮከሬስ ሲሆኑ፣ እያንዳንዳቸው ያስቆጠሩት አምስት ግቦችን ብቻ ነው። ቡካዮ ሳካ በሁሉም ውድድሮች ባደረጋቸው 13 ጨዋታዎች ግብ አላስቆጠረም፤ በተመሳሳይ ዮከሬስ፣ ጋብሪኤል ማርቲኔሊ እና ኖኒ ማዱዌኬ ለረጅም ጊዜ ግብ ሳይቆጥሩ ቀርተዋል።

ሲቲ እና ቪላ አድብተው እየተከተሉ ነው

ማንችስተር ሲቲ ከዎልቭስ ጋር በነበረው ጨዋታ ያገኘው ድል በአራት ጨዋታዎች የቆየውን ያለማሸነፍ ጉዞውን እንዲያበቃና ከአርሰናል በ4 ነጥብ ብቻ ዝቅ ብሎ እንዲቀመጥ አስችሎታል። ምንም እንኳን በጥር ወር ማርክ ጉዌሂን ቢያስፈርሙም፣ የተከላካይ ክፍል ክፍተቶች እና የመካከለኛው ክፍል ወጥ አቋም ማጣት አሁንም የጋርዲዮላ ቡድን ፈተናዎች ናቸው። አርሊንግ ሃላንድ በሊጉ 20 ግቦችን ቢያስቆጥርም፣ በሁሉም ውድድሮች ባደረጋቸው ያለፉት ዘጠኝ ጨዋታዎች ግን ማስቆጠር የቻለው አንድ ግብ ብቻ ነው።

በሌላ በኩል አስቶን ቪላዎች አሁንም “ጥቁር ፈረስ” ሆነው ቀጥለዋል። የኡናይ ኤምሬ ቡድን ከሲቲ ጋር በእኩል ነጥብ ከአንደኝነቱ በ4 ነጥብ ብቻ ርቆ የሚገኝ ሲሆን፤ በዚህ የውድድር ዓመት አርሰናልን፣ ሲቲን፣ ዩናይትድን እና ቼልሲን ማሸነፍ ችሏል። ቪላዎች ካለፉት 18 ጨዋታዎች 15ቱን ቢያሸንፉም፣ ባለፈው ሳምንት በኤቨርተን የደረሰባቸው ያልተጠበቀ ሽንፈት ግን ዕድሉን ሳይጠቀሙበት እንዲቀሩ አድርጓል።

ከፊታቸው ካሉት ከባድ ጨዋታዎች—ከዩናይትድ፣ ቼልሲ፣ ሊቨርፑል እና በመጨረሻው ቀን ወደ ሲቲ የሚደረገውን ጉዞ ጨምሮ—የቪላ ጠባብ ስብስብ እስከ ጥራቻው ይፈተናል።

የተለየ የዋንጫ ፉክክር

እንደ ቅርብ ዓመታት ሳይሆን፣ በዚህኛው የውድድር ዘመን የበላይነቱን ወስዶ በቁጥጥር ስር ያዋለ አንድም ቡድን የለም። ይልቁንም ዋነኞቹ ተፎካካሪዎች ርቀው ለመሄድ የሚረዷቸው ዕድሎች ሲመጡላቸው ሲደናቀፉ ይታያሉ። ይህ ምስቅልቅል ሁኔታም ሳይታሰብ ማንችስተር ዩናይትድ በዋንጫው ፉክክር ውስጥ ስሙ እንዲነሳ በር ከፍቶለታል።ዩናይትድ ዋንጫውን የማንሳት ዕድሉ አሁንም በጣም አነስተኛ ቢሆንም፤ አርሰናል፣ ሲቲ ወይም ቪላ እንደ ሻምፒዮን መጫወት ካልጀመሩ በስተቀር፣ ይህ አስገራሚ የውድድር ዓመት አንድ የመጨረሻና የማይረሳ ታላቅ ክስተት ሊያስመዘግብ ይችላል።