ፈርጉሰን ዩናይትድ የፕሪሚየር ሊግ ክብሩን ለመመለስ አንድ አስር ዓመት ሊጠብቅ እንደሚችል ተናገሩ፤ አሞሪም በሀሳቡ አልተስማሙም

የማንቸስተር ዩናይትድ አንጋፋ እና አዲሱ አሰልጣኝ ክለቡ ዋንጫ ለማንሳት በሚፈጅበት ጊዜ ላይ በሀሳብ ተጋጩ

ሰር አሌክስ ፈርጉሰን ማንቸስተር ዩናይትድ የፕሪሚየር ሊግ ዋንጫን ዳግም ለማንሳት ሌላ 10 ወይም 11 ዓመታት ሊፈጅበት ይችላል የሚል ግምት በመስጠት ደጋፊዎችን አስደንግጠዋል። ፈርጉሰን በክለቡ የነበራቸውን የመጀመሪያ ዓመታት በማስታወስ፣ አሁን ያለውን የዩናይትድ ሁኔታ ሊቨርፑል በ1990ዎቹ ካጋጠመው የዋንጫ ድርቅ ጋር አነጻጽረውታል። አያይዘውም በሊጉ አናት ላይ ተፎካካሪ ሆኖ መቅረብ ያለውን ፈተና አጽንዖት ሰጥተው ገልጸዋል።

የማንቸስተር ዩናይትዱ አሰልጣኝ ሩበን አሞሪም ለቀረበው ግምት በሀሳቡ እንደማይስማሙ ፈጣን ምላሽ ሰጥተዋል። አሞሪም ሲናገሩ፦ “እሳቸው ከእኔ ይልቅ ስለ እግር ኳስ፣ በተለይም ስለ እንግሊዝ እግር ኳስ የተሻለ እውቀት አላቸው፤ ሆኖም ሊጉን ለማሸነፍ ያን ያህል ረጅም ጊዜ አይፈጅብንም። ምንም እንኳን ያኔ የትኛው አሰልጣኝ እዚህ እንደሚሆን ባላውቅም” ብለዋል።

ግልጽ የሆኑ ድንበሮችን ማበጀት

አሞሪም በአንዳንድ ተጫዋቾች ዘንድ የሚታየውን “ያለአግባብ ይገባኛል” የማለት ስሜት በግልጽ ነቅፈዋል። በቅርቡ እንደ ሃሪ አማስ እና ቺዶ ኦቢ ያሉ ወጣት ተጫዋቾች፣ አሰልጣኙ ስለ ብቃታቸው የሰጡትን አስተያየት የሚቃረን መረጃ በሶሻል ሚዲያ ላይ ማጋራታቸው በቡድኑ ውስጥ ያለውን ውጥረት ይፋ አድርጓል።

“ተጫዋቾቹ አንዳንድ ጊዜ ለማንቸስተር ዩናይትድ መጫወት ምን ማለት እንደሆነ ይረሱታል። ይህንን ‘ያለአግባብ ይገባኛል’ ባይነት ስሜት መታገል ይኖርብናል። የእኔ በር ሁልጊዜ ክፍት ቢሆንም፣ ማንም መጥቶ የሚያናግረኝ የለም፤ እውነታው ግን ችግሮችን መፍታት የምንችለው በዚህ መንገድ (በግልጽ በመነጋገር) ብቻ ነው” ሲሉ አሞሪም  ተናግረዋል።

 የኮቢ ማይኑ ጉዳይ

አሞሪም በ20 ዓመቱ ኮቢ ማይኑ ዙሪያ የተፈጠረውን ውዝግብ አስመልክቶ ማብራሪያ ሰጥተዋል። ማንቸስተር ዩናይትድ ከቦርንመዝ ጋር 4 ለ 4 በሆነ ውጤት ባጠናቀቁበት ጨዋታ ላይ፣ የማይኑ ወንድም “ኮቢ ማይኑን ነፃ አውጡት” የሚል ጽሑፍ ያለበት ቲሸርት ለብሶ መታየቱ አነጋጋሪ ነበር። አሰልጣኙ ግን ይህ ድርጊት በማይኑ የመሰለፍ ዕድል ላይ ምንም ዓይነት ተፅዕኖ እንደማይኖረው በግልጽ አስታውቀዋል።

 “ቲሸርቱን የለበሰው ኮቢ አይደለም። እሱ ለጨዋታው ትክክለኛው ተጫዋች ሆኖ ከተገኘ ይሰለፋል። ከቦርንመዝ ጋር በነበረው ጨዋታ ተቀይሮ ከገባ በኋላ በጣም ጥሩ ተጫውቷል፤ ዋናው ቁምነገርም ይሄ ነው” ሲሉ አሞሪም  ተናግረዋል።

የአሸናፊነት ባህልን መገንባት

የአሞሪም አስተያየቶች ትኩረታቸው በዲሲፕሊን፣ በባህል እና በረጅም ጊዜ ስኬት ላይ ያተኮረ አሰልጣኝ መሆናቸውን ያሳያሉ። እንደ ብሩኖ ፈርናንዴዝ ያሉ ቁልፍ ተጫዋቾች የቡድኑን እንቅስቃሴ እየተጠራጠሩ ባሉበት በዚህ ወቅት፣ አሁን ያለው አመራር አሸናፊነትን የተላበሰ አስተሳሰብ ለመገንባት እና “ይገባኛል” የሚል የተሳሳተ ስሜት የቡድኑን እድገት እንዳያደናቅፍ ለማድረግ ቁርጠኛ ነው።

የፈርጉሰን ግምት ክርክር ቢቀሰቅስም፣ አሞሪም ግን እንዲህ ሲሉ አጥብቀው ይከራከራሉ፡- የዩናይትድ የክብር መንገድ የሚወሰነው አሁን በሚወሰዱ እርምጃዎች እንጂ ሌላ አስር አመታትን በመጠበቅ አይደለም።