ባርሴሎና የአልባሴቴን ፈተና ተቋቁሞ ለኮፓ ዴል ሬይ ግማሽ ፍጻሜ ደረሰ።

ባርሴሎና የሴጉንዳ ዲቪዚዮኑን አልባሴቴን 2 ለ 1 በማሸነፍ ወደ ኮፓ ዴል ሬይ ግማሽ ፍጻሜ ያለፈ ቢሆንም፣ ባለፈው ዓመት ዋንጫውን ያነሳው ክለብ ግዙፍ ቡድኖችን በመጣል በሚታወቀው አልባሴቴ እስከ መጨረሻው ጠንካራ ፈተና ገጥሞት ነበር።

ከላሚን ያማል እና ከሮናልድ አራውሆ የተቆጠሩት ግቦች የባርሴሎናን ማለፍ በምቾት የሚያረጋግጡ ቢመስሉም፣ በጨዋታው ማጠናቀቂያ አካባቢ በጃቪ ሞሬኖ የተቆጠረችው ግብ ግን የካታላኑ ግዙፍ ክለብ የመጨረሻውን ደቂቃ ጫና ለመቋቋም እንዲገደድ አድርጎታል።

ይህ ድል ባርሴሎና በኮፓ ዴል ሬይ ታሪክ 33ኛውን ዋንጫ በማንሳት ክብረ ወሰኑን ለማሻሻል የሚያደርገውን ጉዞ ያቀናለታል።

ባርሴሎናዎች ጨዋታውን ከተቆጣጠሩ በኋላ ያማል መሪነቱን አስገኘ።

ባለፈው ዙር ሪያል ማድሪድን በማስደንገጥ ያሸነፈው አልባሴቴ፣ ጨዋታውን በራስ መተማመን የጀመረ ሲሆን በግብ ጠባቂው ጆአን ጋርሲያ ላይ ሁለት ሙከራዎችን ባደረገው አንቶኒዮ ፑዌርታስ አማካኝነት ገና በለጋ ሰዓት ስጋት ፈጥሮ ነበር።

ባርሴሎናዎች ቀስ በቀስ የኳስ ቁጥጥሩን የበላይነት የወሰዱ ሲሆን፣ ጄራርድ ማርቲን ከያማል የተሻገረለትን አደገኛ ኳስ ወደ ላይ በመምታት ቢያባክነውም የግብ ዕድሎችን መፍጠር ጀምረው ነበር።

ከእረፍት በፊት ስድስት ደቂቃዎች ሲቀሩ በተከናወነ ብልህ የአጥቂ መስመር እንቅስቃሴ የመጀመሪያዋ ግብ ተቆጠረች። ማርከስ ራሽፎርድ ሁለት ተከላካዮችን ወደ ራሱ በመሳብ ለፍሬንኪ ዲዮንግ ኳሱን ያቀበለ ሲሆን፣ እርሱም በበኩሉ ወደ መስመር ለወጣው ያማል ኳሱን አሸጋገረለት። ወጣቱ ተጫዋችም ለመጀመሪያ ጊዜ ያገኘውን ኳስ በድንቅ አጨራረስ በግብ ጠባቂው ራውል ሊዞይን አጠገብ አሳልፎ ራቅ ባለው የግብ ማዕዘን ውስጥ አስቆጠራት።

ባርሴሎናዎች ከእረፍት በፊት ሌላኛው ያማል ያሻገረለትን ኳስ ዳኒ ኦልሞ በግንባሩ ገጭቶ ለጥቂት ወደ ውጪ በመውጣቱ መሪነታቸውን በእጥፍ ለማሳደግ ተቃርበው ነበር።

አራውሆ የባርሴሎናን መሪነት አጠናከረ።

ባርሴሎናዎች በሁለተኛው አጋማሽ መጀመሪያ ላይ ማርከስ ራሽፎርድ ሻገረውን የማዕዘን ምት ሮናልድ አራውሆ በከፍታ ዘልሎ በግንባሩ በመግጨት ከመረብ ጋር በማገናኘት መሪነታቸውን ያሰፉ ሲሆን፣ይህም እንግዶቹ ጨዋታውን ሙሉ በሙሉ እንዲቆጣጠሩ አስችሏቸዋል።

የአልባሴቴው ግብ ጠባቂ ሊዞይን በሮበርት ሌዋንዶቭስኪ እና በኦልሞ የተሰነዘሩ ሙከራዎችን በሚያስደንቅ ብቃት በማዳን ቡድኑ በፉክክር ውስጥ እንዲቆይ ያደረገ ሲሆን፣ ፌራን ቶሬስም ያገኘውን ጥሩ አጋጣሚ ወደ ግብ አናት በመምታት አባክኖታል።

የአልባሴቴ የመጨረሻ ደቂቃ ግብ ለጨዋታው አስጨናቂ ፍጻሜ ፈጠረ።

አስተናጋጆቹ ተስፋ ለመቁረጥ ፈቃደኛ ያልነበሩ ሲሆን፣ ጨዋታው ሊጠናቀቅ ሦስት ደቂቃ ሲቀረው ጃቪ ሞሬኖ ከሆሴ ካርሎስ ላዞ የተሻገረለትን ኳስ በግንባሩ በመግጨት የግብ ልዩነቱን ማጥበብና ሌላ ያልተጠበቀ ድል የመቀዳጀት ተስፋን ማንቀሳቀስ ችለው ነበር።

ባርሴሎናዎች ከጥቂት ቅጽበቶች በኋላ ቶሬስ ግብ በማስቆጠሩ ድላቸው የተረጋገጠ መስሏቸው የነበረ ቢሆንም፣ የቪዲዮ ረዳት ዳኛው ግቡ ከጨዋታ ውጪ ነው በሚል ውድቅ በማድረጉ የመጨረሻው የጨዋታ ክፍለ ጊዜ አስጨናቂ ሆኖ እንዲቀጥል አድርጓል።

ምንም እንኳን በመጨረሻዎቹ ደቂቃዎች ጫና ቢደረግባቸውም፣ ባርሴሎናዎች በፅናት በመከላከል ለግማሽ ፍጻሜው ያላቸውን ቦታ ያስከበሩ ሲሆን፣ የሀገር ውስጥ ዋንጫን የማሸነፍ ጉዟቸውንም አስቀጥለዋል።