ጁቬንቱስ ናፖሊን በመጨፍለቅ በዋንጫ መከላከያ ጉዟቸው ላይ ከባድ ድብደባ አሳረፈ

ዴቪድ፣ ይልዲዝ እና ኮስቲች የሜዳ ላይ የበላይነት የታየበትን ድል አረጋግጠዋል

ጁቬንቱስ በአሊያንዝ ስታዲየም ናፖሊን 3 ለ 0 በሆነ ውጤት በመርታት የናፖሊን የሴሪ አ ዋንጫን የመከላከል ጉዞ አዳጋች እንዲሆን ሲያደርገው፣ በዚህ የውድድር ዘመን በሁሉም ውድድሮች በሜዳው ያለመሸነፍ ታሪኩን አስቀጥሏል።

ጆናታን ዴቪድ ከመጀመሪያው አጋማሽ መጠናቀቅ በፊት መሪነቱን ሲያገኝ፣ ጁቬዎች በጥንቃቄ በተመራ የመከላከል ብቃት ታጅበው በጨዋታው ማጠናቀቂያ ላይ በኬናን ይልዲዝ እና በፊሊፕ ኮስቲች ግቦች ድላቸውን አረጋግጠዋል። ውጤቱም ናፖሊ ከመሪው ኢንተር ሚላን በ9 ነጥብ እንዲርቅ ሲያደርገው፣ ከሁለተኛው ኤሲ ሚላን ጋር በነጥብ እኩል ለመሆን የነበረውን ዕድል አሳጥቶታል። 

ጁቬንቱስ ሙሉ በራስ መተማመን ወደ ጨዋታው የገባ ሲሆን ፈጣን አጀማመርም አድርጓል። ዌስተን ማክኬኒ ከአንድሪያ ካምቢያሶ የተሻገረለትን ኳስ በጭንቅላቱ ገጭቶ ወደ ውጭ ሲሰደው፣ ኬፍረን ሁራም በመጀመሪያው አጋማሽ የመታው ኃይለኛ ኳስ በግብ አግዳሚው ተመልሶበታል።

ጁቬ ጨዋታውን ተቆጣጥሯል

ናፖሊዎች ጫና በመፍጠር ምላሽ ለመስጠት የሞከሩ ሲሆን፣ አንቶኒዮ ቬርጋራ የሞከረውን ኳስ ግብ ጠባቂው ሚሼል ዲ ግሪጎሪዮ በሚገርም ብቃት አድኖበታል። ራስመስ ሆይሉንድም ያደረገው ሙከራ ተከላካዮች ጋር ተጋጭቶ ተመልሷል። እነዚህ ሙከራዎች ቢኖሩም፣ በ22ኛው ደቂቃ ቀዳሚ የሆኑት ጁቬዎች ነበሩ።

ማኑኤል ሎካቴሊ የተከላካይ ክፍሉን ሰንጥቆ ያሳለፈለት ኳስ ጆናታን ዴቪድን ከግብ ጋር አገናኝቶት፣ ካናዳዊው አጥቂም በተረረጋ መንፈስ ኳሷን ዝቅ አድርጎ መትቶ በታችኛው የግብ ጥግ አሳርፏታል።

ጁቬንቱስ ከእረፍት በፊት ሁለተኛ ግብ ለማግኘት ጥረት አድርገዋል። ሎካቴሊ ሁለት ተከላካዮችን አልፎ በመግባት ግብ ጠባቂው አሌክስ ሜሬትን የፈተነ ሲሆን፣ ሁራም ወደ ግብ የላከው ሌላ ኳስ ደግሞ ተጨርፎ ወደ ማዕዘን ወጥቷል።

በሁለተኛው አጋማሽ መጀመሪያ ላይ ናፖሊዎች አቻ ለመሆን በትዕግስት ጥረት ያደረጉ ሲሆን፣ ሆይሉንድ ወደ ውጭ የወጣ ሙከራ አድርጓል። ሆኖም ጁቬዎች የናፖሊን የጨዋታ ቅኝት ለማበላሸት ያላሰለሰ ጥረት በማድረጋቸው ግልፅ የግብ ዕድሎችን ማግኘት ለናፖሊ አዳጋች ነበር።

የጨዋታው ማጠናቀቂያ ግቦች ድሉን አሳምረውታል

አዘጋጆቹ ጨዋታው ሊጠናቀቅ 13 ደቂቃዎች ሲቀሩ ሙሉ ቁጥጥሩን በእጃቸው አደረጉ። ፋቢዮ ሚሬቲ በሳጥን ውስጥ ለኬናን ይልዲዝ ያቀበለውን ኳስ ወጣቱ ኮከብ ሜሬትን አልፎ እንዲገባ በማድረግ የጁቬንቱስን መሪነት ወደ ሁለት አሳድጓል።

ከዚያች ቅፅበት ጀምሮ ጁቬዎች በከፍተኛ መተማመን የተጫወቱ ሲሆን፣ ጨዋታው ሊጠናቀቅ አራት ደቂቃ ሲቀረው ፊሊፕ ኮስቲች ከሳጥኑ ጠርዝ ላይ የመታው ኃይለኛ ኳስ ግብ ሆኖ ውጤቱን 3 ለ 0 አድርጓል።

ሮሜሉ ሉካኩ በጭማሪ ሰዓት ያደረገው ሙከራ ወደ ውጭ ሲወጣ፣ ናፖሊ በ10 ጨዋታዎች ውስጥ የመጀመሪያውን ሽንፈት አስተናግዷል። እንዲሁም ከሜዳው ውጪ ከጁቬንቱስ ጋር ባደረጋቸው ያለፉት ሰባት ጨዋታዎች ድል ማግኘት አልቻለም።