በስታምፎርድ ብሪጅ የታየ ምስቅልቅል፣ ተቃውሞ እና የቆዩ ድክመቶች

የተከፋፈለ  የስታዲየም ድባብ እና ሌላ ያመለጠ ዕድል

ኤንዞ ማሬስካ ከጨዋታው መጀመር በፊት ከቼልሲ ደጋፊዎች ጋር ስለሚኖር አንድነት ተናግረው የነበረ ቢሆንም፣ በስታምፎርድ ብሪጅ ከቦርንማውዝ ጋር 2–2 በሆነ አቻ ውጤት በተጠናቀቀው ምስቅልቅል የተሞላ ጨዋታ የታየው ግን ከዚህ በተቃራኒ ነበር። በሁለተኛው አጋማሽ ኮል ፓልመር ሲቀየር የተሰማው የተቃውሞ ጩኸት እና ጨዋታው ሲጠናቀቅ ከመድረኩ የታየው ብስጭት፣ ቼልሲ አሁንም የጨዋታ ብልጫን ወደ ድል መቀየር አለመቻሉን አመላካች ነው።

ይህ የአቻ ውጤት አሳሳቢውን ጉዞውን አራዝሞታል። ቼልሲ አሁን ባደረጋቸው ሰባት የፕሪምየር ሊግ ጨዋታዎች ያስመዘገበው አንድ ድል ብቻ ሲሆን፣ በሜዳው መሪ ሆኖ ሳለ አሳልፎ የሰጠው ነጥብ 13 ደርሷል፤ ይህም በሊጉ ካለ ከማንኛውም ቡድን የላቀ ያደርገዋል።

ረጅም የእጅ ውርወራዎች፣ የቁጥጥር መጥፋት እና በ መደናገጥ ውስጥ የሚደረግ መከላከል 

የአደጋው ምልክቶች ገና በጊዜ የታዩ ነበሩ። በርንማውዝ የቼልሲን ደካማ ስብስብ በቀጥታ አጨዋወት ኢላማ ያደረጉ ሲሆን፣ ይህም ወዲያውኑ ውጤት አስገኝቶላቸዋል። አንቶይን ሴሜንዮ በረጅሙ የወረወረውን የእጅ ኳስ ጄምስ ሂል ሲገጨው፣ ዴቪድ ብሩክስ ምንም ዓይነት መከላከል ሳይደረግበት በስድስተኛው ደቂቃ ላይ ሮበርት ሳንቼዝን አልፎ በማስቆጠር መሪ አድርጓቸዋል።

የቼልሲ ምላሽ ከመረጋጋት ይልቅ መደናገጥ የታየበት ነበር። በሁለቱም ወገኖች ቁጥጥር በጠፋበት የመጀመሪያ አጋማሽ፣ በርንማውዝ በረጅም የእጅ ውርወራዎች እና በሁለተኛ ኳሶች የቼልሲን የውድድር ዘመኑን ዋነኛ ድክመት በመጠቀም ሲያውኩ ታይተዋል።

ግብ የበዛበት እና መረጋጋት የራቀው ጨዋታ

ቪኤአር ጣልቃ ከገባ በኋላ በተሰጠው የፍፁም ቅጣት ምት ኮል ፓልመር ጎል አስቆጥሮ ቼልሲን አቻ ካደረገ በኋላ፣ ኤንዞ ፈርናንዴዝ ድንቅ በሆነ አጨራረስ በማሳየት ቡድኑን 2-1 መሪ ማድረግ ችሎ ነበር። ሆኖም አሁንም መሪነቱ ረጅም ጊዜ አልቆየም።

ሌላኛው የሴሜንዮ የእጅ ውርወራ ሁከት የፈጠረ ሲሆን፣ ሂል የመጀመርያውን ኳስ ካገኘ በኋላ ጀስቲን ክሉይቨርት በሩቅ ቋሚ በኩል ሰርቆ በመግባት ጎል አስቆጥሯል። ይህም በጉልበት፣ በጎል እና በሁለቱም ወገን በመከላከል ምስቅልቅል የተሞላውን አጋማሽ ማሳያ ነበር።

የተቃውሞ ጩኸት፣ ድፍረት የተሞላበት ቅያሬዎች እና እየባሰ የመጣ ውጥረት

ማሬስካ በእረፍት ሰዓት ሪስ ጄምስን እና ፔድሮ ኔቶን በማስገባት ለውጥ ለማምጣት ቢሞክሩም፣ በሁለተኛው አጋማሽ ላይ ፓልመር ከሜዳ ሲወጣ ግን የስታዲየሙ ድባብ ይበልጥ ተበላሸ። ከፍተኛ የተቃውሞ ጩኸት የተሰማ ሲሆን፣ የአሰልጣኙን ውሳኔ የሚጠራጠሩ መፈክሮችም ተደምጠዋል።

ከጩኸቱ ባሻገር ቼልሲ ግፊት ማድረጉን ቀጥሏል። ኤስቴቫኦ ተፅዕኖው እየጨመረ የመጣ ሲሆን፣ ፈርናንዴዝ ዘግይቶ ያገኘውን ወርቃማ ዕድል ሳይጠቀምበት ቀርቷል፤ በርንማውዝ ወደ ኋላ ተመልሰው እንዲከላከሉ ተገደዋል። ሆኖም ወሳኙ የድል ጎል ሊገኝ አልቻለም።

ተመሳሳይ ችግሮች፣ ተመሳሳይ ውጤት

በርንማውዝ በጭማሪ ደቂቃ ላይ በኤነስ ኡናል የጭንቅላት ኳስ አማካኝነት ጨዋታውን ሊነጥቁ ተቃርበው የነበረ ቢሆንም፣ አቻ ውጤቱ ለጨዋታው የሚገባ ይመስላል። ቼልሲ የብልጫ ጊዜያት እና ጥራት ያላቸው እንቅስቃሴዎች ቢኖሩትም፣ ወሳኙ ሰዓት ላይ ግን ጨዋታውን መቆጣጠር ተስኖታል።

ለአሰልጣኝ ማሬስካ ጥያቄዎች እየበረቱባቸው ሲሆን፣ ለቼልሲ ደጋፊዎች ደግሞ ትዕግስት እያለቀ ነው።