ከውሽንፍሩ በኋላ መረጋጋት፡ ዩናይትድ በመጨረሻ በኦልድትራፎርድ አበራ

በመጨረሻም፣ ለሩበን አሞሪም ሰላማዊ ከሰዓት። የዩናይትድ አለቃው ቡድናቸው ሰንደርላንድን 2ለ0 ሲያሸንፍ ተመልክተዋል እና
በዚህ ጊዜ የገጠመው ብቸኛ ማዕበል ከኦልድትራፎርድ ሰማይ የወረደው ዝናብ ብቻ ነበር።
ከሳምንታት ግፊት እና ትችት በኋላ አሞሪም በመጨረሻ ከራዕዩ ጋር የሚመጣጠን ብቃት አግኝቷል። በሜሰን ማውንት እና
ቤንጃሚን ሼሽኮ የተቆጠሩት ግቦች ዩናይትድ በሊጉ የዘንድሮ ሶስተኛ ድሉን እና የመጀመሪያውን ክሊን ሺት እንዲያገኝ
አስችሎታል፤ ይህም ለደጋፊዎች በዝናብ እና በነፋስ ውስጥ የሚያስደስታቸው ነገር ሰጥቷቸዋል።

ማውንት ቀድሞ የሰንደርላንድን መከላከል ሰበረ

ዩናይትድ ጨዋታውን በጉልበትና በቁርጠኝነት ጀመረ። ገና በዘጠነኛው ደቂቃ ላይ ብራያን ምበኦሞ በብልሃት ያቀበለው ኳስ
ማውንትን የግብ ክልል ውስጥ አገኘው። አማካዩ ኳሷን በእርጋታ ተቆጣጥሮ ወደ ግብ ቀይሯታል ይህም በኦልድትራፎርድ
ያስቆጠረው የመጀመሪያው የፕሪሚየር ሊግ ጎል ሆኗል። የእፎይታ ስሜት በመላው ስታዲየሙ ተስተጋባ።
ከብሬንትፎርድ ሽንፈት በኋላ አሞሪም አምስት የተጫዋች ለውጦችን አድርጎ ነበር። ከእነዚህም መካከል ለመጀመሪያ ጊዜ
ለወጣቱ ግብ ጠባቂ ሴኔ ላመንስ ዕድል ሰጥቶት ነበር። ሰንደርላንድ በርናርድ ትራኦሬ ቀድሞ ያገኘውን ዕድል አበላሽቶ የነበረ
ሲሆን፣ እንግዶቹም ከዚያ በላይ ወደ ግብ አልቀረቡም።
ከአሞሪም በጣም ከሚተማመንባቸው ተጨዋቾች አንዱ የሆነው ማውንት ያለመሰልቸት ሲሰራ ታይቷል ፤ብሩኖ ፈርናንዴስ እና
ካሴሚሮ የመሀል ሜዳውን እንዲቆጣጠሩ እና ማንኛውንም አደጋ እንዲያስወግዱ ረድቷል። ለመጀመሪያ ጊዜ ዩናይትድ ሚዛኑን
የጠበቀ፣ በራስ የመተማመን እና ተቆጣጣሪ ሆኖ ታይቷል።

ሼሽኮ የመሪነቱን በእጥፍ አሳደገ

የሜዳው ባለቤት ቡድን ተጨማሪ ግብ ለማስቆጠር ሲጫወት አማድ ዲያሎ እና ምቤኦሞ በቀኝ በኩል አደገኛ ጥምረት ፈጥረው
ነበር። የሰንደርላንድ ግብ ጠባቂ ሮቢን ሮፍስ የፈርናንዴስን ኳስ በመንካት አድንቷል፣ ነገር ግን ዩናይትድ ወደፊት መግፋቱን ቀጠለ።
በመጨረሻም፣ ጽናታቸው ፍሬ አፍርቷል። ከዲያጎ ዳሎት የተሻገረ ረዥም ኳስ በሳጥኑ ውስጥ ግርግር ፈጥሮ ነበር፣ ኳሱ ከተከላካይ
እግር ተመልሶ ሼሽኮ በቅጽበት ተጠቅሞበት 2ለ0 አድርጓል። ሁለት ጎሎች፣ ሁለት ፈገግታዎች ፤ ኦልድትራፎርድ በመጨረሻ
የሚደሰትበትን ነገር አግኝቷል።
የሰንደርላንድ የኋላ መስመር ግራ እንደተጋባ ነበር የሚታየው፣ አሰልጣኝ ሬጂስ ለ ብሪስም ከዚያ በኋላ ተከላካይ ተጨዋች
በማስገባት ምላሽ ሰጥተዋል – ይህ እንቅስቃሴ የዩናይትድን የበላይነት የሚያሳይ ነበር።

የመጨረሻ ሰአት ድራማ የለም፣ ጨዋታውን መቆጣጠር ብቻ

ከእረፍት በፊት አንድ አስደንጋጭ ክስተት ነበር፤ ዳኛ ስቱዋርት አትዌል፤ ሼሽኮ ትራይ ሁምን እንደገፋው በማመን ለሰንደርላንድ
የፍጹም ቅጣት ምት ሰጥቶ ነበር። የቪኤአር ሲስተም እርማት በማድረጉ መሪነቱ ሳይለወጥ ቀርቷል።
ሁለተኛው አጋማሽ የተረጋጋና ሚዛናዊ ነበር። የድሮውን ዩናይትድ ባናይም ፕሮፌሽናል ግን ነበሩ። የአሞሪም ልጆች ኳስን
ተቆጣጥረው፣ ጥብቅ ሆነው እና ስህተትን በማስወገድ ተጫውተዋል። የመጨረሻው የፍጻሜ ፊሽካ ሲነፋ የእፎይታ ስሜቱ ግልጽ
ነበር።

ቀጣዩስ? ወደ አንፊልድ ጉዞ። አሞሪም ቀላል እንደማይሆን ያውቃል፣ ነገር ግን ከዚህ አቋም በኋላ በመጨረሻ በሰላም መዘጋጀት
ይችላል።